Powěsće Serbskeho rozhłosa
Hauptinhalt
04. róžownika 2024, 16:05 hodź.
Ralbicy: Planuja dalše powołanske wiki
2. regionalne powołanske wiki na Serbskej wyšej šuli w Ralbicach wotměja so lětsa spočatk oktobra. Kaž hłowny zamołwity organizatoriskeho teama Matthias Klimank zdźěli, měri so zarjadowanje wosebje na šulerjow a šulerki 7. do 10. lětnika, kaž tež jich staršich. "Woni změja składnosć, so pola zastupjerjow regionalnych zawodow, institucijow a powołanskich poradźowarjow wo wukubłanskich móžnosćach a perspektiwach informować dać", tak Klimank. Na prěnich powołanskich wikach před dwěmaj lětomaj bě wjace hač 50 wustajerjow pódla.
Wokrjes Budyšin: Nowej wuchowanskej straži
W Zdźěrje ma hač do 2026 nowa wuchowanska straža nastać. Kaž zdźěli krajnoradny zarjad jako zamołwita instanca za wuchowanske słužby na naprašowanje, hišće lětsa planowanje za nowotwar zakónča. Klětu započnu něhdźe 2,2 milionaj eurow drohu stražu při wotbočce na B156 twarić. W njej změja dwě wuchowanskej awće městno. Tež za Zejicy je nowa wuchowanska straža předwidźana. Za nju chce wokrjes 1,4 miliony eurow wudać. Planowanje klětu zahaja, twarić započnu 2026. Hdźe dokładnje ma straža w Zejicach nastać, dotal hišće jasne njeje. Tuchwilu pytaja zamołwići za wotpowědnej ležownosću.
Wojerecy: Za zhromadny wodowy management
Běrow za zhromadne wobhospodarjenje wody rěkow Sprjewja, Čorny Halštrow a Łužiska Nysa w Sakskej a Braniborskej su pjatk we Wojerecach załožili. Kaž zdźěli Sakske ministerstwo za energiju, škit klimy a ratarstwo, maja so tak wšitke procesy a projekty centralnje koordinować a wodowy management polěpšić. Předewšěm wuchodne kónčiny Němskeje bědźa so dźeń a bóle z pobrachowacej wodu. Wina na tym stej mjez druhim změna klimy a spadowaca dnowa woda wudobywanja brunicy dla. Hižo w lěće 1999 je so dźěłowa skupina za wobhospodarjenje wody załožiła. Tutu ma wotnětka Wojerowski běrow podpěrać.
Turizm: Aktualizowana karta wušła
Turistiski zwjazk Łužiska jězorina je předźěłanu kartu wo městnach za campingowe a bydlenske mobile wudał. Kaž zwjazk zdźěli, je aktualizowana karta w nakładźe 30.000 eksemplarow wušła. Wona wobsahuje wuběr nimale 40 tajkich městnow za campingowe a bydlenske wozy, kaž tež caravany we Łužiskej jězorinje. Zajimowani dóstanu kartu bjezpłatnje w turistiskich informacijach mjez druhim w Złym Komorowje, Wojerecach a při Bjerwałdskim jězoru. Karta je tež online na stronach zwjazka Łužiska jězorina přistupna.
Wojerecy: Prěnju bajowu dźěłarničku wotměli
We Wojerecach zaběra so wot pjatka w Domowinskim domje šěsć zajimcow z bajemi. Wiceprezidentka Europskeje towaršnosće bajkow sposrědkuje jim hač do njedźele znajomnosće wo wuměłstwje swobodnje bajki a powěsće bać. Dwurěčny kurs je regionalna managerka za projekt ZARI, Sonja Hrjehorjowa, organizowała.
