Powěsće: pjatk, 03.05.2024
Hauptinhalt
06. róžownika 2024, 14:45 hodź.
Wobsah artikla:
- Mjeńšinowa politika: Žadaja sej jasne wuznaće
- Hornja Łužica: Wabja zaměrnje wo dorost
- Rowno: Zběhanka za nowu pěstowarnju
- Wulke Rědorjecy/Großröhrsdorf: Proces přećiwo pozdatnemu zapalerjej cyrkwje dźe dale
- Budyšin: Milan Hrabal nowu zběrku basnjow předstajił
- Drježdźany: EUPHORISCHE KOMPLEXE – rozmołwny koncert
- Nowa Wjeska: Jurij Šołta-Nowowjesčanski njebóh
Mjeńšinowa politika: Žadaja sej jasne wuznaće
Južnoschleswigski wolerski zwjazk SSW chce jasne wuznaće schleswigsko-holsteinskeho knježerstwa k škitej a spěchowanju narodnych mjeńšin na krajnej a zwjazkowej runinje docpěć. Pozadk su lětuše wólby Europskeho parlamenta. Po woli SSW ma krajny sejm w Kielu 22. meje wobzamknyć, zo měło so krajne knježerstwo za wutworjenje městna komisara za narodne mjeńšiny EU zasadźeć. Nimo toho žada sej wolerski zwjazk wutworjenje institucije za regionalne a mjeńšinowe rěče EU a wjac fleksibelnosće při přiwzaću mjeńšinowych rěčow jako hamtske rěče. Z tym ma so widźomnosć mjeńšinowych rěčow zwyšić, tak SSW.
Hornja Łužica: Wabja zaměrnje wo dorost
Cyłkownje 505 lětušich šulskich wotchadnikow z wuchodneje Sakskeje je dotal zrěčenje za powołanske wukubłanje podpisało. To je po informacijach Sakskeje rjemjeslniskeje komory w Drježdźanach nimale runje telko kaž loni. Kaž komora dale informuje je pak hišće něhdźe 400 wukubłanskich a praktikumowych městnow swobodne. Najbóle prašane su powołanja kaž mechatronikar, elektronikar, blidar, muler, frizerka, třěchikryjer abo fachowa předawarka. Loni je něšto wjace hač 2.000 žonow a muži z wukubłanjom k jednomu z 80 wšelakich powołanjow započało.
Rowno: Zběhanka za nowu pěstowarnju
W nowej pěstowarni “Milenka” w Rownom změja pjatk zapozdźenu zběhanku. Twarske dźěła dyrbjachu před połdra lětom pomnikoškita a insolwency twarskeje firmy dla wotpočować. Po informacijach wjesnjanosty Jörga Fundy nadźijeja so, zo budźe pěstowarnja kónc tutoho lěta, najpozdźišo pak srjedź přichodneho lěta dotwarjena. Přidatne wudawki za nowotwar pěstowarnje we wysokosći 1,2 milionow eurow přewza kraj Sakska.
Wulke Rědorjecy/Großröhrsdorf: Proces přećiwo pozdatnemu zapalerjej cyrkwje dźe dale
Proces přećiwo pozdatnemu zapalerjej cyrkwje we Wulkich Rědorjecach – Großröhrsdorf – dźe dale. Kaž rjekny prawiznik Florian Berthold sćelakej MDR SAKSKA, předleži wusud sudnistwa mjeztym pisomnje. Po prěnim pruwowanju dwěluje prawiznik na tym, zo je při přesłyšowanju wobskorženeho wšitko prawje běžało a dwěle ma na zasudźenju tohorunja, dokelž pobrachuja wuprajenja fachowcow k přičinje wohenja. Njejasne je dale, hač je móžno z poł litrom bencina cyłu cyrkej zamiškrić. Wo rewiziji rozsudźi něhdźe za měsac sudnistwo w Lipsku. Pozdatny zapaler cyrkwje we Wulkich Rědorjecach bu kónc februara ćežkeho zapalerstwa dla k 9 lětam jastwa zasudźeny.
Budyšin: Milan Hrabal nowu zběrku basnjow předstajił
Basnik Milan Hrabal je swoju nowu basniku zběrku "Domluvena šifra - Dojednana šifra" štwórtk w Smolerjec kniharni předstajił. Kniha wobjimuje něhdźe 40 čěskich basnjow, kotrež wobjednawaja Hrabalowe dožiwjenja we Łužicy a ze Serbami. Zdobom je Towarstwo přećelow Serbow cyłu swoju ediciju "Lužickosrbska poezie" předstajiło, w kotrejž je Hrabalowa zběrka pjate wudaće. Na połsta ludźi je štwórtkowne zarjadowanje wopytało.
Drježdźany: EUPHORISCHE KOMPLEXE – rozmołwny koncert
Na koncerće, kiž bě wěnowany komponistej Juro Mětškej w Drježdźanskej centralnej bibliotece, poby wčera něšto wjac hač 60 wopytowarjow. Zaklinčachu hudźbne twórby Mětška, čemuž přizamkny so rozmołwa z komponistom a znajerjom Mětška, Jakobom Ullmannom, a załoženskim čłonom skupiny Ensemble unitedberlin, Andreasom Bräutigamom. Přez program wjedła bě Dr. Theresa Jacobsowa ze Serbskeho instituta, kotraž bě loni wudała portret wo Mětšku we formje zešiwka.
Nowa Wjeska: Jurij Šołta-Nowowjesčanski njebóh
Dźensa rano docpě nas zrudźaca powěsć, zo je Jurij Šołta - Nowowjesčanski w starobje 89 lět zemrěł. Po studiju slawistiki a pedagogiki w Lipsku bě lěto na filologiskej fakulće Praskeje Karloweje uniwersity, hdźež studowaše nimo serbšćiny tež čěšćinu a rušćinu. Šołta bě docent za delnjoserbšćinu na Serbskim wučerskim wustawje a wučer w Róžeńće a w Ralbicach. Wón nawjedowaše Nowowješćansku Domowinsku skupinu a spěwaše sobu w chórje Lipa. Za swoje zasłužby nastupajo styki Serbow k Čecham bu Nowowješćan Jurij Šołta 2020 z Mytom Domowiny počesćeny. Hišće jako wuměnkar je mnohe lěta we wjace hač 30 kursach dorosćenym znajomosće serbšćiny a čěšćiny sposrědkował.
