Powěsće: póndźelu, 06.05.2024
Hauptinhalt
06. róžownika 2024, 08:50 hodź.
Łužica: Na mnohich wsach meju mjetali
Na wjacorych městnach w Hornjej Łužicy je so minjenu sobotu meja mjetała. Tak je so w Pančicach-Kukowje wšo dohromady 47 porow młodostnych a dźěći w serbskej katolskej narodnej drasće na nałožku wobdźěliło. We Wojerowskej serbskej narodnej drasće je so sobotu w Čornym Chołmcu 19 porow na mejemjetanju wobdźěliło. W Spalach bě sej sobotu 28 holcow Wojerowski narodnu drastu woblekło. A w Blunju je dźewjeć porow w narodnej drasće wokoło meje rejowało.
Koćina: Burske wiki w mlokowym swěće
Wjacore tysacy ludźi je njedźelu lětuše wulke burske wiki w Koćinje wopytało. Kaž zdźělištaj jednaćelej Krabatoweho mlokoweho swěta, Tobias Kockert a Beno Mróz, su lětsa rjemjeslnicy a regionalni producenća zežiwidłow swoje wudźěłki na wjac hač 70 stejnišćach poskićeli. Wotewrěł je wiki Sakski ministerski prezident Michael Kretschmer. Přitomna bě tež mlokowa princesna Vanessa Grafec z Hodźija. Wulke burske wiki w Koćinje wuhotuje Krabatowy mlokowy swět wot lěta 2009.
Praha: Dorostowa skupina SLA dobyła
Dorostowa rejowanska skupina Serbskeho ludoweho ansambla "Łužičanska rapsodija" je kónc tydźenja na rejowanskim wubědźowanju "Ave Bohemia" w Praze w swojej kategoriji prěnje městno docpěła. Na wubědźowanju z dohromady 190 přinoškami z cyłeho swěta pokaza dźesać młodostnych reji “Krakowiak” a “Wochožansku reju”. Poslednju předstajichu w serbskej narodnej drasće. Pod nawodom Kornela Kolembusa je so skupina na předkole sobotu za njedźelnišu rejowansku galu kwalifikowała.
Malešecy: Muski chór Delany zaso spěwał
Něhdźe 80 ludźi je njedźelu w Malešanskej cyrkwi nalětni koncert Serbskeho muskeho chóra Delany dožiwiło. Mužojo předstajichu pod nawodom Mateja Kowarja nimo serbskich wuměłskich a ludowych tež wjacore słowjanske a němske pěsnje. Bě to prěni wjetši koncert Delanow po nimale dwě a poł lěće, dokelž bě so muski chór womłodźił. Připowědźeny dźěćacy program pak dyrbješe Malešanska WITAJ-pěstowarnja chorosće dla wotprajić. Krótkodobnje wupomhała je z hudźbnym programom Grofic swójba z Malešanskeje wosady.
Wojerecy: Wjacore turistiske projekty
Při Šibojskim jězoru chce město Wojerecy wjacore turistiske projekty zwoprawdźić. To je měšćanska rada na swojim minjeny wuradźowanju wobzamknyła. Mjez druhim je planowana dožiwjenska šćežka wot Łužiskeje kupjele hač k zapadnemu přibrjohej jězora. Nastać matej direktnje při jězoru kofejownja a wjacezaměrowe twarjenje. Cyłkowne košty trochuja so na 7,1 milion eurow. Město nadźija so 95 procentowskeho spěchowanja ze stron Sakskeje a Zwjazka.
Budyšin: Dźiwadźelnica na wuměnk šła
Dźiwadźelnica Petra-Maria Bulankec-Wenclowa je so na wuměnk podała. Kaž zdźěli Němsko-Serbske ludowe dźiwadło, su so zašły tydźeń z wjelelětnej hrajerku doma rozžohnowali. Kaž dźiwadło dale informuje, je Bulankec-Wenclowa přez wjele lět mnohostronske róle na jewišću prezentowała – a to w němskej, hornjoserbskej a w delnjoserbskej rěči. Klětu je Petra-Maria Bulankec-Wenclowa jako hóstna hrajerka na jewišću widźeć.
Wosady: Prěnje swjate woprawjenje
W Chrósćicach a Budyšinje su njedźelu dźěći prěnje swjate woprawjenje přijimali. Na serbskej Božej mši w Chrósćicach bě jich 33 a na němskich kemšach dźesać dźěći. W Budyšinje je na serbskich kemšach pjeć dźěći prěnje swjate woprawjenje dóstało. Wšitke tři holcy běchu jako družki šli.
