Powěsće: štwórtk, 02.05.2024
Hauptinhalt
02. róžownika 2024, 06:52 hodź.
Serbska rěč: Jěwa-Marja Čornakec dóstanje Zejlerjowe myto 2024
Jěwa-Marja Čornakec je lawreatka lětušeho Zejlerjoweho myta. To je wčera Sakske statne ministerstwo za kulturu a turizm wozjewiło. Čornakec dóstanje myto za jeje wusahowace zasłužby na polu serbskeje literatury, rěka we wopodstatnjenju spožčenskeje jury. Jěwa-Marja Čornakec pokazuje přikładnje, kak móže so serbskosć z kreatiwitu, angažementom a zaměrnosću dale wuwiwać. Publicistka je mjez druhim 15 serbskich dźěćacych a młodźinskich knihow wudała. Myto, kiž je z 5.000 eurami dotěrowane, přepoda Sakska ministerka za kulturu a turizm Barbara Klepschowa 17. junija w Kamjencu.
Serbske nałožki: Někotre meje na serbskich wsach podrězali
W nocy na 1. meju su w někotrych hornjołužiskich wjeskach meje podrězali, mjez druhim we Łusču a w Sernjanach. Kaž nam policija wobkrući je w Koslowje k rozestajenju dóšło. Tam chcyše horstka młodostnych tamnišu młodźinu nastróžić a jich meju podrězać. Jako tam dojědźechu, nawali so na nich cyła črjóda ludźi a jim tři wobruče awta rozkałachu a chcychu tež ludźi z awta sćahnyć, na čož jedna młodostna policiju wo pomoc zawoła. Tohorunja meju podrězali su w nocy na wčerawšu srjedu tež w Lipsku, kaž nam studenća Sorabije Lipsk zdźělichu. - We Łusču su młode swójby lětsa po 27 lětach zaso meju stajili. Prěni raz scyła su meju lětsa w Lejnje stajili, zdźěli wjesny chronikar Benedikt Cyž, kiž je za tym slědźił, ale ničo w stawiznach wjeski nadešoł, zo je we wsy hdy meja stała.
Pančicy-Kukow: Aktualny staw Muzeja Ćišinskeho
Župa “Michał Hórnik” Kamjenc chce so wo dalše spěchowanske srědki za Muzej Ćišinskeho w Pančicach-Kukowje prócować. Wužiwać chcedźa je za wobsahowe znowawuhotowanje witrinow Muzeja Ćišinskeho, zdźěli regionalna rěčnica Domowiny za Kamjenski region Katharina Jurkowa. Tuchwilu přihotuja próstwu wo spěchowanje z Leader-programa. Digitalne wobsahi ponowjeneho muzeja su dozhotowjene. Nětko maja so hišće wobsahi 60 lět starych witrinow do wustajeńcy zaplesć. Hišće lětsa ma so Muzej Ćišinskeho w šuli w Pančicach-Kukowje znowa wotewrić.
Ratarstwo: Zmjerzk truskalcam zdźěla zeškodźał
Domanjic ratarski zawod z Hózka změje lětsa posledni raz na něhdźe třoch hektarach truskalcowe polo w Sćijecach. Kaž zdźěli ratar Michał Domanja na naprašowanje, su pódu hižo spřihotowali, w přichodnych měsacach tam truskalcy zesadźeja. Klětu změja Domanjicy nowe truskalcowe polo a to z Budyšina do směra na Budestecy. W Kašecach su zmjerzki minjeny tydźeń na truskalcowym polu škodu nadźěłali. Kaž wobsedźer dr. Christian Bock zdźěli, njemóže hišće rjec, kelko škody su kćenja poćerpjeli. Tuchwilu škitaja tam rostliny dale z foliju. Dr. Bock pak liči z tym, zo móža sej za něhdźe dźesać dnjow zajimowani w Kašecach prěnje truskalcy šćipać.
Literatura: Serbske basnje w Rumunskej zaklinčeli
Na mjezynarodnym festiwalu banatskich Šwabow, kiž je so tele dny w rumunskim městačku Reșița wotměł, su literaća a nakładnicy z wjacorych krajow srjedźneje Europy nowe knihi a teksty we wšelakich rěčach předstajili. Kaž zdźěli basnik a publicist Benedikt Dyrlich běchu mjez nimi tež serbske. Tak je awtor a nakładnik Traian Pop swoju serbsko-němsku zběrku basnjow „Posledni sněh/Der letzte Schnee” předstajił a z njeje někotre teksy rumunsce čitał. Serbsce a němsce předstajištaj tute Benedikt Dyrlich a Dorotheja Šołćina.
