Powěsće: wutoru, 30.04.2024
Hauptinhalt
30. jutrownika 2024, 08:08 hodź.
Wobsah artikla:
- Serbske nałožki: Na wjacorych wsach mejestejnje a mejemjetanje wožiwja
- Hornja Łužica: Wjacore hromady za chodojtypalenje dočasnje wotpalene
- Miłoćicy: Marja Michałkowa dale předsydka CSB
- Ratarstwo: Žně hromaka dotal dobre
- Hornja Łužica: Strach lěsnych wohenjow stupa
- Budyšin: Přichod Klóšterka dale njejasny
Serbske nałožki: Na wjacorych wsach mejestejnje a mejemjetanje wožiwja
Po lětdźesatkach přestawki chcedźa wutoru w Bukecach zaso meju stajić a přichodny tydźeń mjetać. Bukečanska Bjesada a Kulturu spěchowace towarstwo přihotujetej nałožkaj zhromadnje z dalšimi partnerami ze wsy. Tak chcedźa organizatorojo serbsku tradiciju w Bukecach wožiwić a do kulturneho žiwjenja wsy zapřijeć. Za mejemjetanje 11. meje přihotuja organizatorojo program z Bukečanskej drastowej skupinu, dujerjo wosady za to serbske ludowe spěwy nazwučuja. Tež we Łusču chcedźa młode swójby lětsa po 27 lětach zaso meju stajić a zhromadnje z wjesnej młodźinu a dźěćinu 31. meje po tradiciji meju mjetać. W Zejicach wjesna zhromadnosć lětsa scyła prěni raz meju staji. Kaž nam wot tam zdźělichu, pak hinak hač na druhich wsach, wutoru ranku wija a swoju meju hakle srjedu, na prěnjej meji, dopołdnja staja.
Hornja Łužica: Wjacore hromady za chodojtypalenje dočasnje wotpalene
Za chodojtypalenje je zarjadniski zwjazk "Při Klóšterskej wodźe" dotal 31 wohenjow dowolił. Kaž ze zarjada w Pančicach-Kukowje rěka, wotměje so něhdźe jedna třećina chodojtypalenjow na gmejnskich ležownosćach, dalše na priwatnych. Přizjewić pak maja so wšitke hromady, kiž su wjetše hač 1,50 m. Na najwjace wsach chodojtypalenja stražuja, mjez druhim w Nowoslicach. W Słonej Boršći pak dyrbjachu njedźelu rano wobornicy hromadu hašeć. Tež při Budyskim spjatym jězoru je so hromada wotpaliła. A hnydom dwójce je wohnjowa wobora hromadu w Róžeńće hašała a to njedźelu a póndźelu rano. W gmejnje Hodźij je 27 wohenjow přizjewjene, zdźělichu zamołwići na naprašowanje.
Miłoćicy: Marja Michałkowa dale předsydka CSB
Marja Michałkowa wostanje dale předsydka Křesćansko-socialneho kubłanskeho skutka CSB. Čłonojo su ju na wčerawšej sobustawskej zhromadźiznje w Miłoćicach na dalšej lěće do zastojnstwa wuzwolili. Zdobom zaběrachu so přitomni z aktualnymi projektami CSB. W srjedźišću steješe mjez druhim dalewuwiće klóšterskeje zahrody a dźěćaceje a młodźinskeje farmy we Wojerecach. Wosebite ćežišćo je lětsa dalši wutwar serbskorěčnych poskitkow we wšěch 11 pěstowarnjach w nošerstwje CSB. Hladajo na mjezynarodne styki so ze zawěsćenjom noweje spěchowanskeje doby europskich projektow dźěławosć CSB na tutym polu wozrodźi.
Ratarstwo: Žně hromaka dotal dobre
Hornjołužiscy ratarjo su z dotalnymi žnjemi hromaka dosć spokojom. To wobkrućichu wjacori na naprašowanje. Kaž zdźěli jednaćel ratarskeje towaršnosće na Horach pola Wojerec, Roland Nuck, su hižo 30. měrca, – tak zahe kaž hišće ženje – kałać započeli. Zašły tydźeń mějachu ćeže zmjerzka dla – špicki hromaka su tež pod foliju zmjerznyli. Problemy zmjerzka dla Domanjicy w Hózku njemějachu. Kejžorska zelenina hakle zašłe dny tak prawje rosć započała. Kwalita je lětsa znowa dobra, rjekny Michał Domanja. Płaćizna na kilo hromaka wučinja lětsa mjez 7 a něšto wjac hač 10 eurami.
Hornja Łužica: Strach lěsnych wohenjow stupa
Strach lěsnych wohenjow w Hornjej Łužicy spěšnje zaso přiběra. Wo tym informuje statny zawod Sachsenforst. Hižo nětko płaći w najwjace dźělach wokrjesow Budyšin a Zhorjelc warnowanski schodźenk 3, w sewjernych dźělach na mjezy k Braniborskej mjeztym schodźenk 4. Za srjedu připowědźeja fachowcy za kónčiny sewjernje Wojerec warnowanski schodźenk 5. Tam njeměł hižo nichtó wjace do lěsa chodźić.
Budyšin: Přichod Klóšterka dale njejasny
Přichod Budyskeho klóštra Klarissow je dale njejasny. Zo ma so Klóšterk rozpušćić njeje biskopstwo Drježdźany-Mišno na naprašowanje ani wobkrućiło ani dementowało. Kaž zdźěli rěčnik biskopstwa, je aktualnje na wukaz zamołwitych w Romje mnich jako japoštołski komisar zasadźeny. Wón a dalša pomocnica mataj prašenja za dalše wuwiće klóštra rozrisać, štož hišće traje. Njedorozumjenjow dla běchu nazymu 2022 někotre sotry z klóštra wućahnyli a wo „ćežkim wuwiću” kaž tež wo „skradźu rosćacej krizy” rěčeli. Sotry su so loni do Budyšina nawróćili.
