Powěsće: sobotu, 27.04.2024
Hauptinhalt
29. jutrownika 2024, 09:04 hodź.
Załožba za serbski lud: Čaka na poslednje "okay" z Berlina
Direktor Załožby za serbski lud, Jan Budar, liči z tym, zo Zwjazk w běhu přichodnych tydźenjow skónčnje swój lětuši spěchowanski podźěl, kiž serbskej załožbje płaći we wysokosći 12 milionow eurow, přizwoli. Přidatnje dawaja znowa 4,5 milionow ze strukturneho hornca. Lětsa bě tomu přeni raz, zo je dyrbjał etatowy wuběrk zwjazkoweho sejma přihłosować, zo smě załožba srědki serbskim institucijam dale dać. Hač budźe to tež w přichodnych lětach trěbne, njeje hišće jasne, zdźěli Jan Budar na naprašowanje. Tuchwilu dyrbi direktor jeničce z podźělnymi financami Sakskeje a Braniborskeje hospodarić.
Nałožki: Hałužki za wěncy prašane
Šmrěkowych hałužkow za wiće rankow a wěncow za meje je lěto a mjenje. To zdźělichu na naprašowanje wjacori fachowcy lěsnistwa. Hłowna přičina za woteběracy wobstatk šmrěkow je skórnik, praji zamołwity za klóšterske lěsy Ulrich Furchner. We łužiskich lěsach tež žane šmrěki wjac njesadźeja, dokelž so to njewudani. Dalša přičina je zmjerzk zašłych nocow. Kaž zdźěli sobudźěłaćer lěsniskeho zawoda Thurn und Taxis Forst, Markus Rjeda, je nimale wša młodźina šmrěkow zmjerznyła. Fachowcy poručeja wšěm, kiž hišće hałužki za swoje ranki a wěncy trjebaja, so pola rewěrowych hajnikow přizjewić abo so pola priwatnych wobsedźerjow lěsow naprašować.
Pančicy-Kukow: Nowy digitalny přewodnik za klóšter
Klóšter Marijina Hwězda w Pančicach-Kukowje a zarjadniski zwjazk "Při Klóšterskej wodźe" dóstanjetej nowy digitalny přewodnik. Za njón je pjatk sakska ministerka za kulturu a turizm, Barbara Klepschowa, 200.000 eurow nawodźe zarjadniskeho zwjazka Stefanej Andersej přepodała. Zwjazk a towarstwo "Přećelski kruh klóštra Marijina Hwězda" chcetej pjenjezy nałožować, zo by nastał multimedialny informaciski a wodźenski system po klóštrje a gmejnach zarjadniskeho zwjazka. Projekt w pjeć rěčach so 100-procentowsce spěchuje.
Radwor: Wohnjowa wobora ma nowu chorhoj
Radworska wohnjowa wobora ma prěni raz w swojich stawiznach swójsku chorhoj. Wona bu pjatk wječor na kemšach poswjećena. Na tutych a na swjedźenju po tym je so na dźesatk woborow z wokoliny wobdźěliło. Mysličku za swójsku chorhoj mějachu Radworčenjo na kóždolětnych kemšach wohnjowych wobornikow w Róžeńće. Radworska wobora ma 30 aktiwnych kameradow. K tomu su před lětomaj hišće młodźinsku wohnjowu woboru załožili, kotraž ma tuchwilu 15 dźěći.
Kultura: SLA přihotowany na zarjadowanja pod hołym njebjom
Serbski ludowy ansambl je na sezonu zarjadowanjow pod hołym njebjom přihotowany. Kaž SLA w nowinskej zdźělence informuje, so k swjatkam areal při Bismarckowej wěži w Bórkowach składnostnje Błótowskeje nocy powěsćow k wulkemu jewišću přetwari. Wot kónca meje so Byrgarska zahroda zaso z hudźbu a zabawu wožiwja. Dohromady 16 koncertnych wječorkow je w Kulturnej zahrodźe předwidźane. A tež něhdyše ryćerske kubło w Smochćicach stanje so wosrjedź junija składnostnje hudźbneho swjedźenja Smochćicy zaso z jewišćom pod hołym njebjom.
